قناة المهرِّج الفضائية: حوار في الأزمة العراقية المستعصية على الحل!

أحمد الحاج

اعزائي المشاهدين مرحبا بكم في حلقة جديدة من برنامجكم الأسبوعي "يوميات وطن  Gone with the Wind"، عنوان حلقتنا لهذا اليوم "اذا كلها تصلي وتلطم.. فمن الذي سرق العراق؟!".

تابعونا..

 

أرحب بضيوفي الكرام "الناهب- عفواً- النائب عن كتلة - الأبطال- كنفش  خريبط  العاشق (بالله هو هذا اسم مال  أوادم وفوقاها يصير نائب) والنائبة عن - إختلاف - الكفاءات الوطني الحر ، رياح  مظلوم  الرعدي ، ووزير الدولة للشؤون فوق الحمراء ، مسعد فرهود البرقي ، ونبدأ بسؤال الناهب الأول: من الذي سرق العراق؟ باختصار رجاء..

- الحقيقة والواقع كلنه حرامية.. من دون استثناء.. شلع قلع.. نحن لم نقدم شيئا للعراق منذ 2003 والى يومنا هذا!!

* دقيقة ...يعني حتى جنابك  الكريم؟

- اصلا آني وكتلتي ومن يقف خلفنا اولهم !!

* ولكن هذا اقرار بالسرقة  امام ملايين المشاهدين وانت بكامل قواك العقلية والجسدية وبكل حرية ومن غير ضغط ولا إكراه والإقرار وفقا للقانون هو سيد الأدلة ، اما اتهامك لبقية الكتل -الكونكريتية- بسرقة المال العام والخاص فهو بمثابة شهادة تستدعي احضارك الى المحكمة -  سحل من الياخة - من امام الاستوديو بصفة شاهد ومتهم في نفس الوقت وإحالتكم الى القضاء بسلة واحدة!!

- لقد قلت ما عندي حتى اريح ضميري - خطية .. شكد شريف - ولديَّ ملفات ووثائق ومستندات تثبت تورط الجميع بالفساد وسأعرضها من خلال برنامجكم في اقرب فرصة ولو كلفني ذلك حياتي .. اي حياتي، اهم شي الأخلاق!!

- ننتقل بالسؤال الى الناهبة رياح .. كلكم متهمون بالفساد وتعترفون بذلك امام الناس، معقولة؟ .. لعد وين النزاهة والشفافية والوطنية التي تتشدقون بها سنين طويلة امام الشاشات انتم وكتلكم؟.. كلها كلاوات؟

* شوف استاذ اني دائما اكول وبإمكانك ان ترجع وتتابع جميع الحلقات المتلفزة التي تم استضافتي فيها  انو "اللي يبتعد عن داره يقل مقداره" وانو "الطماطة ترهم بكلشي" وانو "التبسي سيد المائدة بلا منازع خصوصا مع البتيتة جاب وكبة حلب" ...

- لحظة ست رياح ماجاوبتيني على سؤالي؟

* هاي شبيك مستعجل .. غير دا افصل الموضوع اولا وابدأ باستهلالات وباستدلالات تنطلق من عالم الدلالات والفرارات.. ياعيني .. ثق ماضيَّع العراق غير استعجالكم ، يعني  ايام النظام السابق برررر تررررر كرررر....! نفس القوانه والاسطوانه المشروخة.

- آني دا أسأل حضرتك، هل كلام الأخ كنفش صحيح بشأن تورط  الجميع بسرقة المال العام وبالفساد المالي والإداري والسياسي ام لا؟ 

* ياأخي انطيني مجال احجي .. انت انطيته 10 دقائق بدون مقاطعة ليش ماتطيني مجال مثل ما انطيته.. طبعا أكيد لأن من مكونك... تظلون طائفيين، الدم الدم .. الموت الموت .. التأر الثأر.. 1400 سنة تحكمون وما تنظيني مجال خمس دقائق أعبر فيها عن وجهة نظري ... آني كتلك الطماطة ترهم بكلشي تمام يو لا؟ وكتلك التبسي سيد المائدة بس ماخليتني اكمل على الطرشي!!

- ماذا تقول استاذ مسعد... استاذ مسعد ... يمعووووود!!

* تثاؤب، ليش هو شكو شنهو الخبر دحجيلي؟.. ارجو  إعادة  السؤال لأن كنت نايم - تعرف جنابك كنت سهران في سبيل القضية وهموم المواطن ومصلحة الوطن  للصبح إيييييه هاهي،  اهم شي المصلحة مو مشكلة الصحة!!

اعزائي المشاهدين لقد انتهى وقت البرنامج ولا يسعني في ختام حلقتنا لهذا اليوم الا ان اشكر ضيوفي في الاستوديو وكلهم من أحفاد حنون الذي مازاد في الأسلام خردلة ولا النصارى لهم شأن بحنون، ولله در القائل:

قومي رؤوس كلهم .... أرأيت مزرعة البصل؟

أودعناكم اغاتي